အသိပညာဗဟုသုတနဲ့ကျွမ်းကျင်မှုပေါင်းစပ်မှသာဘဝအတွက်အာမခံချက်ရှိတဲ့အလုပ်တစ်ခုရမယ်ဆိုတာကို အားလုံးကသိရှိကြပြီးဖြစ်မှာပါ။အသိပညာအတွက် ငွေတွေအများကြီးအကုန်ခံ ဘွဲ့လက်မှတ်တွေယူခဲ့၊ သင်တန်းတွေတက်ခဲ့ပြီးပေမယ့်စိတ်ကျေနပ်စရာကောင်းတဲ့အလုပ်ကိုရလိမ့်မယ်လို့ အပြည့်အဝသတ်မှတ်ထားလို့မရသေးပါဘူးနော်။ကိုယ့်ရဲ့ဘဝခရီးနဲ့အလုပ်မှာပျော်ရွှင်ဖို့ကတော့ ကိုယ့်ရဲ့တန်ဖိုးထားမှုကဘာလဲဆိုတာကိုသိဖို့လိုပြီးအဲဒီတန်ဖိုးထားမှုကိုမထိခိုက်စေမယ့်အလုပ်မျိုးကိုပဲစဥ်းစားရွေးချယ်ရမှာဖြစ်ပါတယ်။ကိုယ်ကတရားမျှတမှုရှိတာ၊ ရိုးသားတာကိုတန်ဖိုးထားတယ်ဆိုရင် အထက်ဖားအောက်ဖိအလုပ်မျိုး၊အမြီးကျက်အမြီးစား ခေါင်းကျက်ခေါင်းစားအလုပ်မျိုးတွေကို ဘယ်လိုမှလုပ်နိုင်မှာမဟုတ်ပါဘူး။ တချို့လူတွေပြောကြတာက ဝင်ငွေတစ်ခုပေးနေလို့အလုပ်လို့ခေါ်တာပါတဲ့။ အလုပ်လုပ်တဲ့အခါငွေတစ်ခုတည်းကိုကြည့်ပြီး ငွေအတွက်နဲ့အလုပ်လုပ်နေကြသူတွေလည်းရှိပါတယ်။သူတို့အနေနဲ့ငွေရတာမှန်ပေမယ့် ဘဝကိုတန်ဖိုးပြည့်ဝစွာနေထိုင်နိုင်ခြင်းကိုတော့ ဆုံးရှုံးရမှာဖြစ်ပါတယ်။တချို့တွေကတော့ငွေရဖို့ဆိုတာထက်ပိုတဲ့တခြားသောအရာတွေကြောင့်အလုပ်လုပ်နေကြတာဖြစ်ပါတယ်။ -ကိုယ်ကျွမ်းကျင်တဲ့အရာကိုလုပ်နေရလို့ -တခြားလူတွေက ကိုယ့်ကိုလိုအပ်နေလို့ -လူတွေကိုကူညီနိုင်လို့ -အလုပ်ကြောင့် မိမိကိုယ်ကိုယ်ယုံကြည်မှုတိုးလာလို့ -လူတွေနဲ့တွေ့ဆုံရတာကိုပျော်လို့ စတာတွေကြောင့်ဖြစ်ပါတယ်။ […]
