ရောင်းသူနှင့် ဝယ်သူကြား ဆက်ဆံရေး ကောင်းမွန်အောင် တည်ဆောက်နည်း (၄) နည်း

ဝယ်သူစိတ်ကြိုက်ဖြစ်ပြီး ဈေးဝယ်မြဲအောင် ထိန်းထားဖို့အတွက် စီးပွားရေး လုပ်ငန်းရှင်များ ကြိုးစားကြပါတယ်။ ဝယ်သူများကြား ဆက်ဆံရေး ကောင်းမွန်အောင် တည်ဆောက်ခြင်းအားဖြင့် ကုန်ပစ္စည်းအမှတ်တံဆိပ်ကို ကြော်ငြာပြီးသားဖြစ်သလို ပြိုင်ဘက်ကုမ္ပဏီထက် တစ်ပန်းသာစေမှာ သေချာပါတယ်။

ဝယ်သူနဲ့ ပြောဆိုရာမှာ အသံအနေအထားမှအစ အရေးကြီးသလို အရောင်းပေ့ချ်မှ တဆင့် ကြော်ငြာမက်ဆေ့ချ်များ ပို့ချိန်မှာ တစ်သမတ်တည်း ရှိနေဖို့လည်း လိုအပ်လှပါတယ်။ ဝယ်ယူသူကို တန်ဖိုးထားပြီး ဆက်ဆံချိန်မှာ brand နဲ့ တစ်သားတည်း ဖြစ်သွားစေပြီး ဝယ်ယူချင်စိတ် မြင့်မားစေမှာပါ။
ဝယ်သူဆက်ဆံရေး တိုးမြင့်စေသော နည်းလမ်း (၄) ခုကို Online review platform တစ်ခုဖြစ်တဲ့ Trustpilot ရဲ့ ပဲ့ကိုင်ရှင် Peter Muhlmann မှ ခုလို ဝေမျှထားပါတယ်။

(၁) မပျော်ရွှင်သော ဈေးဝယ်များဆီ တုံ့ပြန်ပါ

ရိုင်းစိုင်းသော comments များ သို့မဟုတ် နစ်နာအောင် ရေးထားသော သုံးသပ်ချက်များကို လျစ်လျူရှုဖို့ ကြိုးစားခြင်းက သင့်လုပ်ငန်းရဲ့ ပုံရိပ်ကို ထိခိုက်စေပါတယ်။ ပြဿနာကို ရှောင်လွှဲမရဘဲ သဘောထားပွင့်လင်းစွာဖြင့် အစစ်အမှန် တုံ့ပြန်သင့်ပါတယ်။ ပြဿနာတစ်ခုကို ပြေလည်အောင် ဖြေရှင်းနိုင်တဲ့ customer service ကို မြင်ပြီးချိန်မှာ လုပ်ငန်းရဲ့ အမှားအပေါ် ခွင့်လွှတ်နိုင်သူ တိုးစေသလို အရင်ထက် ဈေးဝယ် များပြားစေမှာ ဖြစ်ပါတယ်။

(၂) အချိန်ကိုက် reply ပြန်ပါ

Comments တွေ ထိုင်ဖြေပြီး ပြဿနာဖြေရှင်းရုံမျှဖြင့် မလုံလောက်ဘဲ ၂၄ နာရီအတွင်း တုံ့ပြန်ချက်ပေးနိုင်အောင် အကောင်းဆုံး ကြိုးစားသင့်ပါတယ်။ customer service တစ်ခုတည်းကိုသာ အာရုံစိုက်သော စနစ်တစ်ခု သတ်မှတ်ထားခြင်းအားဖြင့် ဝယ်သူအပေါ် အလေးထားကြောင်း ပြသရာ ရောက်စေပါတယ်။ ဝယ်သူများအား ဝန်ဆောင်မှု ပေးနိုင်အောင် call center များနဲ့ ချိတ်ဆက်ပြီး မက်ဆေ့ချ်ဖြေကြားခြင်း ဆောင်ရွက်နိုင်သလို အွန်လိုင်းမှ အလိုအလျောက် auto-reply များလည်း ဆောင်ရွက်ထားရှိသင့်ပါတယ်။

(၃) အသွား – အပြန် ဆက်ဆံရေး လိုင်းဖောက်ပါ

ရောင်းသူနဲ့ ဝယ်သူကြားမှာ ပြောဆိုဆက်သွယ်နိုင်အောင် ဆိုရှယ်မီဒီယာ platforms တွေ သုံးသင့်ပါတယ်။ ဖေ့စ်ဘွတ် မက်ဆင်ဂျာ သုံးခြင်းအားဖြင့် မေးခွန်းများကို ဖြေကြားနိုင်ပြီး ဖေ့စ်ဘွတ် live မှ တစ်ဆင့် အမေး၊ အဖြေ ဆောင်ရွက်ပေးခြင်းအားဖြင့် လူပေါင်းများစွာ ကြားသိနိုင်ပြီး ဝယ်သူများကြား ထိရောက်မှု ရှိစေပါတယ်။

(၄) အွန်လိုင်းပေါ်မှ ပြဿနာများကို ဖြေရှင်းပါ

Online platforms မှတဆင့် ပွင့်လင်းမြင်သာသော ဆက်ဆံရေး တည်ဆောက်သကဲ့သို့ အီးမေးလ်၊ ဖုန်းဆက်သွယ်ခြင်းအားဖြင့် ဝယ်သူများရဲ့ ပြဿနာများကို ဆောင်ရွက်ပေးသင့်ပါတယ်။ ဝယ်သူမှ မကျေနပ်ချက်တစ်စုံတစ်ရာ ပြောလာချိန်မှာ ဆိုင်ရှင်ဘက်မှ တုံ့ပြန်ချက်အတွက် အဆင်သင့် ဖြစ်နေသင့်ပြီး ဆက်သွယ်ရမည့် ဖုန်းနံပါတ် ပေးထားချိန်မှာ ရုံးချိန်အတွင်း ဖြေကြားနိုင်မယ့် ဝန်ထမ်းကိုပါ တစ်ပါတည်း ခန့်အပ်ထားရမှာ ဖြစ်ပါတယ်။ သတ်မှတ်ထားသော အချိန်ပမာဏအတွင်း အကြောင်းပြန်ဖို့ ကတိပေးထားပေမဲ့ တကယ်တမ်း ကတိကို ချိုးဖောက်ချိန်မှာ ဝယ်သူတစ်ယောက် ဆုံးရှုံးရစေပါတယ်။
ဝယ်သူရဲ့ စိတ်ကျေနပ်မှု တိုးပွားခြင်းက သင့်လုပ်ငန်းအတွက် အမြတ်ကြမ်းမယ့် အလားအလာကောင်း ဖြစ်ပါတယ်။ ဒါကြောင့် ရောင်းသူ၊ ဝယ်သူကြား ပျော်ရွှင်မှု၊ စိတ်ကျေနပ်မှု ရရှိအောင် ဆောင်ရွက်ခြင်းအားဖြင့် ကုန်ပစ္စည်းအပေါ် ယုံကြည်မှု တိုးစေသလို လုပ်ငန်းပုံရိပ် ကောင်းမွန်မှာ အသေချာပဲ ဖြစ်ပါတယ်။