အလုပ်ရရှိဖို့ အတားအဆီးဖြစ်စေတဲ့ ကြောက်စိတ် (၃)မျိုး

အလုပ်အလျှောက်တဲ့အခါ သူသူငါငါက စိုးရိမ်စိတ်တွေရှိကြတာပုံမှန်ပါပဲ။ ဒီအလုပ်က ရပါ့မလား၊ ရတဲ့အခါမှာရော ကိုယ်က သူတို့လိုချင်တဲ့ ကိုက်ညီတဲ့သူဖြစ်ပါ့မလားဆိုတာတွေကို စိုးရိမ်ပူပန်ကြရပါတယ်။ နောက်ပြီး လုပ်ခန့်အပ်မှုတွေ နှေးကွေးလာတာ၊ လျှောက်လွှာတင်သူတွေ များပြားတာနဲ့ AI နည်းပညာတွေက အလုပ်ခန့်တဲ့ လုပ်ငန်းစဉ်တွေကို ပုံစံပြောင်းလဲပစ်နေတာတွေကြောင့် ဈေးကွက်က မလွယ်ဘူးဆိုတာ ငြင်းလို့မရပါဘူး။ ဒါပေမဲ့ မထိန်းချုပ်နိုင်တဲ့ စိုးရိမ်စိတ်က သင့်အတွက် ကောင်းကျိုးထက် ဆိုးကျိုးသာဖြစ်စေပါတယ်။

တကယ်တမ်း အလုပ်ရသွားတဲ့သူတွေဟာ အမြဲတမ်း အရည်အချင်းအရှိဆုံးသူတွေ မဟုတ်ကြပါဘူး။ သူတို့တွေဟာ ရဲရင့်စွာ လုပ်ဆောင်ရဲတဲ့သူတွေပါ။ ငြင်းပယ်ခံရပေမဲ့ ဆက်လက်လျှောက်ထားရဲခြင်း၊ အဆင်မပြေပေမဲ့ အကူအညီတောင်းရဲခြင်းနဲ့ နည်းပညာအသစ်တွေကို ကြောက်ရွံ့ရှောင်ဖယ်မနေဘဲ လိုက်လျောညီထွေဖြစ်အောင် လုပ်ဆောင်ရဲခြင်းတွေပဲ ဖြစ်ပါတယ်။ရဲရင့်တယ်ဆိုတာ ကြောက်စိတ်မရှိတာ မဟုတ်ပါဘူး။ ကြောက်စိတ်ရှိနေပေမဲ့ လုပ်ဆောင်ရဲတာကို ဆိုလိုတာပါ။ ဒီနေ့ခေတ် အလုပ်ဈေးကွက်မှာ ရဲစွမ်းသတ္တိဆိုတာ ရွေးချယ်စရာတစ်ခု မဟုတ်ပါဘူး။ ဒါဟာ အလုပ်ရှာဖွေမှုမှာ အကောင်းဆုံးသော ယှဉ်ပြိုင်နိုင်စွမ်းဖြစ်ပါတယ်။

အလုပ်ရဖို့အတွက် အတားအဆီးဖြစ်စေတဲ့ မမြင်နိုင်တဲ့ကြောက်စိတ် ၃ မျိုး

အမေရိကန်မှာ ပုဂ္ဂလိက ကဏ္ဍရဲ့ အလုပ်ခန့်အပ်မှုဟာ ၂၀၂၄ ခုနှစ်နှောင်းပိုင်းကနေ တစ်လကို အလုပ်နေရာ ၂၀၀,၀၀၀ ဝန်းကျင်ခန့်ကနေ ၂၀၂၅ ခုနှစ်၊ ဇွန်လမှာ ၁၉,၀၀၀ အထိ လျော့ကျသွားပါတယ်။ ကုမ္ပဏီတစ်ခုရဲ့ အလုပ်နေရာတစ်ခုအတွက် လျှောက်လွှာရာနဲ့ချီ ရောက်ရှိလာနိုင်ပြီး ၃ ရာခိုင်နှုန်းခန့်သာ အင်တာဗျူးအဆင့်ကို ရောက်ရှိကြပါတယ်။ စာရင်းသွင်းထားတဲ့ အလုပ်နေရာ ၂၀ရာခိုင်နှုန်း လောက်ဟာ တကယ်တမ်း အလုပ်ခန့်ဖို့ ရည်ရွယ်ချက်မရှိတဲ့ ghost job တွေပဲ ဖြစ်ပါတယ်။တစ်ချိန်တည်းမှာပဲ Indeed ရဲ့ ဖော်ပြချက်အရ အလုပ်ခွင်ရဲ့ ၅၀ရာခိုင်နှုန်း အထိဟာ အလုပ်ဖြုတ်ခံရမှာကို စိုးရိမ်နေကြပြီး ဒါဟာ ပြီးခဲ့တဲ့နှစ်ကထက် အများကြီး ပိုများလာပါတယ်။ဒါကြောင့် အလုပ်ရှာဖွေသူအများစုဟာ အဆိုးမြင်စိတ်နဲ့ ကြောက်စိတ်ကြောင့် ဘာမှမလုပ်နိုင်ဖြစ်နေကြတာ မဆန်းပါဘူး။ ဒါပေမဲ့ လူတွေကတော့ အလုပ်ဆက်ရနေကြပါတယ်။ ကွာခြားချက်ကတော့ အရည်အချင်း ဒါမှမဟုတ် ကိုယ်ရေးအကျဉ်းတွေသက်သက် မဟုတ်ပါဘူး။ ပြင်းထန်စွာ ယှဉ်ပြိုင်ရတဲ့ အလုပ်ဈေးကွက်မှာ ကြောက်စိတ်ရှိနေပေမဲ့ လုပ်ဆောင်ရဲတဲ့ သတ္တိပဲ ဖြစ်ပါတယ်။ ငြင်းပယ်ခံရမှာကို ကြောက်တာ၊ ကွန်ရက်ချိတ်ဆက်ဖို့ ကြောက်တာနဲ့ AI ကို ကြောက်တာတွေဟာ အရည်အချင်းအရှိဆုံးသော လျှောက်ထားသူတွေကိုတောင် လမ်းချော်သွားစေနိုင်ပါတယ်။ ရဲစွမ်းသတ္တိနဲ့ တုံ့ပြန်နိုင်မှသာ ဒီအခြေအနေတွေကို ကျော်ဖြတ်နိုင်မှာပါ။

၁။ ပယ်ချခံရမှာကို ကြောက်တာ

ပယ်ချခံရတာဟာ ခြွင်းချက်တစ်ခု မဟုတ်ဘဲ ပုံမှန်လို ဖြစ်နေပါတယ်။ ပြိုင်ဆိုင်မှုက ပြင်းထန်ပါတယ်။ ၂၀၂၅ ခုနှစ်မှာ ပုံမှန်အားဖြင့် အ လုပ်လျှောက်ထားသူတစ်ဦးဟာ အင်တာဗျူးတစ်ခုရဖို့အတွက် လျှောက်လွှာပေါင်း ၄၂ ခုတင်ရပါတယ်။ ၃ရာခိုင်နှုန်း ခန့်သာ အင်တာ ဗျူးအဆင့်ကို ရောက်ပါတယ်။ ဒီအခြေအနေက သင့်ရဲ့ ကိုယ့်ကိုယ်ကို ယုံကြည်မှုကို လျှင်မြန်စွာ လျော့ကျစေနိုင်ပါတယ်။ဒါပေမဲ့ ငြင်းပယ်ခံရတာဟာလည်း သင်ကြိုးစားအားထုတ်နေကြောင်း အထောက်အထားတစ်ခုပါပဲ။ တခြားသူတွေ ဘေးထွက်နေချိန်မှာ သင်ဟာ ကြိုးစားလုပ်ဆောင်နေတယ်ဆိုတာကို ပြသနေတာပါ။ ရဲစွမ်းသတ္တိဆိုတာ ငြင်းပယ်ခံရခြင်းကို အဆုံးအဖြတ်တစ်ခုအဖြစ် မမြင်ဘဲ အချက် အ လက်အဖြစ် ပုံပြောင်းသုံးသပ်တာကို ဆိုလိုပါတယ်။ ငြင်းပယ်ခံရတဲ့ လျှောက်လွှာတိုင်းဟာ သင့်ကို သဲလွန်စတွေ ပေးနေပါတယ်။ ဥပမာ- ဘယ်လိုအလုပ်နေရာတွေက တုံ့ပြန်မှုရှိလဲ၊ ဘယ်ကိုယ်ရေးအကျဉ်းတွေက အင်တာဗျူးခေါ်လဲ၊ ဘယ်အရာတွေကို ပြန်လည်ပြုပြင်မလဲ စတာတွေပဲ ဖြစ်ပါတယ်။တကယ့် ရဲစွမ်းသတ္တိဆိုတာ လုပ်ငန်းစဉ်ကြောင့် သင့်ရဲ့ အတ္တထိခိုက်နေပေမဲ့ ဆက်လက်လျှောက်ထားခြင်းပါပဲ။ ဆုတ်ခွာဖို့ စိတ်ကူးနေချိန်မှာ ပြန်လည်ကြိုးစားခြင်းပါပဲ။ တခြားသူတွေ လက်လျှော့လိုက်တဲ့အခါ ထပ်ပြီး လျှောက်ထားခြင်းက ရဲစွမ်း သတ္တိပါပဲ။ အဲဒီနောက်ထပ် လျှောက်လွှာတစ်ခုဟာ သင့်အလုပ်ဖြစ်ချင် ဖြစ်သွားနိုင်ပါတယ်။

၂။ ကွန်ရက်ချိတ်ဆက်မှုကို ကြောက်တာ

အလုပ်ရှာဖွေသူ အများစုအတွက် ကွန်ရက်ချိတ်ဆက်ခြင်းဟာ အဆင်မပြေဘူးလို့ ခံစားရနိုင်ပါတယ်။ လူတွေကို စတင်ဆက်သွယ်ဖို့က စိတ်ထဲက ထစ်နေနိုင်သလို၊ အကူအညီတောင်းဖို့ကလည်း အားငယ်စရာလို ခံစားရနိုင်ပါတယ်။ မက်ဆေ့ချ်တွေ အကြောင်းမပြန်တဲ့အခါ စိတ်ပျက်စရာလည်း ဖြစ်နိုင်ပါတယ်။ ဒီလို အဆင်မပြေမှုကြောင့်ပဲ လူအများအပြားဟာ ကွန်ရက်ချိတ်ဆက်တာကို ရှောင်ကြပါတယ်။ ဒီလိုပြိုင်ဆိုင်မှုပြင်းထန်တဲ့ ဈေးကွက်မှာ ကွန်ရက်ချိတ်ဆက်ခြင်းကို ကျော်သွားတာဟာ အကြီးမားဆုံး အမှားတစ်ခုပဲ ဖြစ်ပါတယ်။အလုပ် လျှောက်လွှာပေါင်း ၁၅,၀၀၀ ကျော်ကို လေ့လာဆန်းစစ်မှုတစ်ခုအရ ၆ ရာခိုင်နှုန်းသာ ရည်ညွှန်းချက် (referral) တွေကနေ ရောက်လာခဲ့ပေမဲ့ အဲဒီ ၆ ရာခိုင်နှုန်းဟာ အလုပ်ခန့်ထားမှုအားလုံးရဲ့ ၃၇ ရာခိုင်နှုန်းအထိ ရှိခဲ့ပါတယ်။ ဒီပုံစံဟာ လုပ်ငန်းနယ်ပယ်အသီးသီးမှာ အမြဲတမ်း မှန်ကန်နေပါတယ်။ ရည်ညွှန်းချက်တွေက လျှောက်လွှာအစိမ်းတွေ (ရည်ညွှန်းချက်မပါတာတွေ) (cold applications) ထက် အများကြီးပိုပြီး အကျိုးရှိပါတယ်။ကွန်ရက်ချိတ်ဆက်ခြင်းဟာ နောက်ဆုံးမှ ကမန်းကတမ်း လုပ်ရမယ့်အရာ မဟုတ်ဘဲ အလေ့အကျင့်တစ်ခု ဖြစ်သင့်ပါတယ်။ ဒါကတော့ ကျောင်းသားဟောင်းအဖွဲ့တွေမှာ ပါဝင်တာ၊ လုပ်ငန်းဆိုင်ရာပွဲတွေကို သွားတာ ဒါမှမဟုတ် လုပ်ဖော်ကိုင်ဖက်ဟောင်းတွေနဲ့ အဆက်အသွယ်လုပ်တာတွေကို ဆိုလိုပါတယ်။ အကောင်းဆုံးအခွင့်အရေးတွေဟာ မကြာခဏဆိုသလို သင့်အနေနဲ့ ပုံမှန်အလုပ်ရှာဖွေရေးစာမျက်နှာတွေမှာတောင် ရှာတွေ့နိုင်ခြင်းမရှိတဲ့ အလုပ်နေရာတွေအတွက် တံခါးဖွင့်ပေးနိုင်တဲ့ မခိုင်မာတဲ့ အဆက်အ သွယ်တွေ (weak ties) ကနေ လာတတ်ပါတယ်။ဒီနေရာမှာ ရဲစွမ်းသတ္တိဆိုတာ ရှောင်ရှားမယ့်အစား အဆင်မပြေမှုထဲကို ရဲရဲဝင်ရောက်ခြင်းပါပဲ။ micro-bravery လို့ခေါ်တဲ့ သတ္တိသေးသေးလေးတွေနဲ့ တွေးကြည့်ပါ။ တစ်နေ့ကို လူသုံးယောက်နဲ့ ဆက်သွယ်တာ၊ ၁၅ မိနစ် ဖုန်းပြောဖို့ တောင်းဆိုတာ ဒါမှမဟုတ် ဒီလမှာ ပွဲတစ်ခုကို တက်ရောက်တာတွေပဲ ဖြစ်ပါတယ်။ သင်ဟာ ပယ်ချခံရမှာကို ရင်ဆိုင်ရမှာဖြစ်ပြီး ဆက်သွယ်မှုအသစ်တွေလည်း ရရှိလာပါလိမ့်မယ်။ကွန်ရက်ချိတ်ဆက်ခြင်းကို ကျော်သွားရင် အလုပ်ရဖို့အတွက် သင့်ရဲ့ အကောင်းဆုံးအခွင့်အရေးကို ကျော်သွားတာနဲ့ အတူတူပါပဲ။ ဒီနေ့လုပ်လိုက်တဲ့ ရဲရင့်တဲ့ ဖုန်းခေါ်ဆိုမှုတစ်ခုဟာ သင့်ရဲ့ နောက်ထပ်အလုပ်အတွက် တံခါးဖွင့်ပေးမယ့် ဆက်သွယ်မှု ဖြစ်နိုင်ပါတယ်။

၃။ AI ကို ကြောက်ခြင်း

AI (Artificial intelligence) ဟာ အလုပ်ရှာဖွေသူတွေအတွက် အသုံးဝင်တဲ့ ကိရိယာတစ်ခုဖြစ်သလို စိုးရိမ်ပူပန်မှုရဲ့ အရင်းအမြစ်တစ်ခုလည်း ဖြစ်လာပါတယ်။ လူအများစုဟာ စက်တွေနဲ့ အစားထိုးခံရမှာကို စိုးရိမ်နေကြပြီး တချို့ကတော့ နားမလည်နိုင်တဲ့ algorithm တွေနဲ့ ယှဉ်ပြိုင်ဖို့ ကြောက်လန့်ပြီး ဘာမှမလုပ်နိုင်ဖြစ်နေကြပါတယ်။ဒီစိုးရိမ်ပူပန်မှုက မှားယွင်းတာတော့ မဟုတ်ပါဘူး။ Stanford သုတေသီတွေရဲ့ အစီရင်ခံစာအရ ၂၀၂၂ ခုနှစ်ကတည်းက AI ဟာ developer ရာထူးနေရာတွေကို ၂၀ ရာခိုင်နှုန်းအထိ လျှော့ချခဲ့ပြီး အစပိုင်းရာထူးတွေဟာ အလိုအလျောက်စနစ်နဲ့ အစားထိုးခံရဖို့ အထိခိုက်နိုင်ဆုံး ဖြစ်ကြောင်းကို မီးမောင်းထိုးပြခဲ့ပါတယ်။ တစ်ချိန်တည်းမှာပဲ Gartner ရဲ့ ခန့်မှန်းချက်အရ Fortune 500 ကုမ္ပဏီတွေရဲ့ ၈၀ရာခိုင်နှုန်း အထိဟာ ကိုယ်ရေးအကျဉ်းတွေကို စိစစ်ဖို့အတွက် AI-driven software တွေကို အသုံးပြုနေပါတယ်။ဒါက ပုံမှန်ကိုယ်ရေးအကျဉ်းတစ်ခု ပေးပို့ခြင်းဟာ ကိုယ့်ကိုယ်ကို အလုပ်အကိုင်နဲ့ပတ်သက်ပြီး ဆိုးရွားစွာ ထိခိုက်စေတာနဲ့ အတူတူပါပဲ။ ရဲရင့်တဲ့ လုပ်ရပ်ကတော့ AI ကို လျစ်လျူရှုတာ မဟုတ်ပါဘူး၊ AI နဲ့ ထိတွေ့ဆက်ဆံတာပဲ ဖြစ်ပါတယ်။ သင့်ရဲ့ ကိုယ်ရေးအကျဉ်းကို ပိုမိုကောင်းမွန်အောင် ပြုပြင်ဖို့၊ သက်ဆိုင်ရာ keyword တွေနဲ့ လိုက်ဖက်ညီအောင် ပြုလုပ်ဖို့ ဒါမှမဟုတ် အင်တာဗျူးလေ့ကျင့်ခန်းတွေအတွက် AI tool တွေကို အသုံးပြုပါ။ ဒါပေမဲ့ ရိုးသားမှုကိုတော့ အဓိကထားပါ။ အလုပ်ခန့်မယ့် မန်နေဂျာတွေဟာ AI လုံးဝဖန်တီးထားတဲ့ လျှောက်လွှာကို စက္ကန့်ပိုင်းအတွင်း သိနိုင်ပြီး အများစုကတော့ ဒါမျိုးဆိုရင် ပယ်ချမယ်လို့ ပြောကြပါတယ်။ဒီနေရာမှာ ရဲစွမ်းသတ္တိဆိုတာ သင်မလုပ်ရဲခင်မှာပဲ နည်းပညာအသစ်တွေကို စမ်းသပ်ကြည့်ပြီး သင့်ရဲ့ ပြိုင်ဘက်တွေထက် ပိုမြန်မြန် လိုက်လျောညီထွေဖြစ်အောင် လုပ်ဆောင်ခြင်းပါပဲ။ လူသားရဲ့ တီထွင်ဖန်တီးနိုင်စွမ်းကို AI အသုံးချနိုင်မှုနဲ့ ပေါင်းစပ်တဲ့ လျှောက်ထားသူတွေဟာ ထိပ်ဆုံးကို ရောက်ရှိလာမှာ ဖြစ်ပါတယ်။ AI ကို ကြောက်ရွံ့တဲ့သူတွေ မဟုတ်ဘဲ AI နဲ့ ပူးပေါင်းလုပ်ဆောင်တဲ့သူတွေဟာ အောင်မြင်သူတွေ ဖြစ်လာပါလိမ့်မယ်။ ပိုမိုစမတ်ကျကျ ပြင်ဆင်ဖို့အတွက် AI ကို အသုံးပြုခြင်းက သင့်ကို အလုပ်ရစေနိုင်တာပဲ ဖြစ်ပါတယ်။

ဒီအချက်သုံးချက်ကတော့ အလုပ်ရဖို့ အဟန့်အတားဖြစ်စေတဲ့ မမြင်ရတဲ့ ကြောက်စိတ်တွေပဲဖြစ်ပါတယ်။ အလုပ်လျှောက်ထားသူတွေအနေနဲ့ ကြောက်စိတ်တွေကိုကျော်လွှားနိုင်မှသာ အောင်မြင်မှုကို အရယူနိုင်မှာပဲဖြစ်ပါတယ်။

ကျော့ကေခိုင်

zawgyi